Hitabylgja

Síðustu daga er hitinn búinn að vera um og yfir 95 gráður Farenheit (35 á celsius) hérna í Boston. Við Brynja erum svo heppin að vera ekki búin að kaupa okkur loftkælingu og fáum því að svitna ansi vel, sérstaklega á nóttunni. Kosturinn við hitann er hins vegar sá að fólk róast töluvert, en Bostonbúar eiga það til að stressa sig ansi mikið á hlutunum, liggja t.d. ansi vel á bílflautunum. Einnig komst ég í ískynningu í fyrradag þar sem maður borgaði 7 dollara inn í "all you can eat" og var boðið upp á ca. 30 braðtegundir, hver annarri betri. Ég var nú heldur betur í essinu mínu þarna og uppáhaldið mitt var "Lady Fionas Mystical Scoop".

Fótboltaliðið mitt "Euro Club" vann annars 4:0 stórsigur á sunnudaginn og sáu andstæðingarnir aldrei til sólar. Búlgararnir eru að koma ansi vel inn og svo er einn funheitur Hollendingur í framlínunni, sem heitir Dennis.

Brynja skellti sér í saumaklúbb í kvöld og það verður væntanlega ansi skrautlegt. Stelpurnar verða væntanlega föndrandi fram á nótt og ég treysti því að fatakaupakostnaður heimilisins hríðlækki á næstunni.

Afmælisbarn morgundagsins (dagsins að íslenskum tíma) er hún Dagný systir, sem er orðin 15 ára. Til hamingju með afmælið elsku systir!